ثانويةعامة كمياء

مادة_الكيمياء
الكيميا مادة جميلة وسهلة لو فهمتها... امتحانتها سهلة بشكل عام .. وأسألتها بتتكرر على مدار السنين بنفس الطريقة ...
ااه المنهج بقى كبير شوية ..بس انت قده ان شاء الله ..
المصادر_المهمة
■ كتاااب الوافى هو أفضل مصدر لمزاكرة الكيميا
والحل : المدرسة ودليل التقويم وكتاب خارجى أو ملزمة ..
■ لو ملزمة كويسة ومش سايبة كلمة من كتاب المدرسة .. توكل على الله
■ المراجعة : كتاب الامتحان حلو اوى ..
او مندليف برده اسئلته حلوة (الاتنين حلوين بس هات واحد كفاية ) عصفور فى الايد ولا عشرة ع الشجرة
ازاى_اقفل_الكيميا ؟؟! ركز معايا ..
الكيميا عندك قسمين :
غير عضوية( 4 أبواب ) ..
وعضوية (باب ب 4 أبواب ) ..
أولا_الكيميا_غير_العضوية :
الباب الأول : العناصر_الانتقالية
باب مهم جدااااا .... فيه كل حاجة ممكن تتخيلها :
نظرى ... مسائل .... معادلات
النظرى مهم ..أهمية العناصر الانتقالية .. وخواصها .. ( خاصة البارا والدايا ) .. السبائك ...
فيه تعليلات مهمة فى الباب لازم تحفظها كويس
المسائل ... سهلة جدا
احسب العزم ... أيهما بارا ودايا ..أيهما ملون وغير ملون...
المعادلات : مهمة وتتكتب كذا مرة لحد ما تتحفظ ان شاء الله
الباب الأول ... محتاج مزاكرة جامدة +حل كتير + مراجعة مستمرة
________________________________
الباب الثاني : التحليل__الكيميائي
باب صغير .. مفهوش نظرى كتير. ... بس مهم ... وكله معادلات فى التجارب الأساسية والتاكيدية ...
وأهم من حفظ المعادلات انك تكون عارف الكاشف ..و#ناتج_الكشف عن الكاتيونات والانيونات. .. ده هيسهل حفظها
وبرده لازم حل كتيير عشان المعادلات تثبت
والألوان بتاعت الرواسب والابخرة تتحفظ
كراسة صغيرة تجمع فيها معادلات البابين الأول والتانى كده جمعت 90 % من معادلات الكيميا غير العضوية ...
________________________________
الباب الثالث : الاتزان__الكيميائي
أحلى وأسهل باب فى الكيميا كلها ... باب مسائل مباشرة ومضمونة ..
خفيف. .. مفهوش نظرى كتير ..النظرى بتاعه سهل اوى.
ومفهوش معادلات كتير ...هى بس معادلة ولا اتنين بيوصلوا تعريف وسهلين جدا ..
فيه قوانين كتيير.. و#مسائل تعويض مباشر. ..وحبة اثباتات للقوانين دى غالبا مبتجيش غير للأزهر ..بس برده زاكر الإثبات ..
بالمرة تحفظ القانون ..
ولو جه مفيش مشكلة انت مزاكره ...
__________________________
الباب الرابع : الكيمياء__الكهربية
باب كبير وعايز فهم ... يعتبر أصعب باب ومحتاج مزاكرة كتير..وفهم كويس هيبقى تمام
لو فاهم اكسدة واختزال ...معادلاته هتبقى سهلة جدا ..
بيكلم عن خلايا جلفانية تفاعلات اكسدة واختزال (تحدث تلقائيا) توصل تيار كهربى. .
وخلايا الكتروليتية : بالتيار الكهربي تتسبب فى حدوث اكسدة واختزال ( غير تلقائي )
تركز على تطبيقات الخلايا الجلفانية :
الأولية والثانوية ..والتجارب استخلاص الألمونيوم... وتجربة الطلاء.. وتنقية المعادن...((لازم تيجى حاجة منهم فى الامتحان بالرسم والمعادلات))..?? وكمان إثبات قانونى فاراداى مهمين ...
المسائل بسيطة وسهلة بإذن الله ...
________________________
ثانيا___الكيميا_العضوية :
الباب الخامس :الكيمياء__العضوية : كيميا الكربون C
أحلى قسم فى الكيميا وسهلة ان شاء الله
محتاجة منك الأساسيات تتزاكر كويس اوى وكذا مرة ... لأن أول جزء فيها هيسهل عليك الباقى كله ...
خلى بالك :
■ فيه حاجة اسمها التسمية بتسمى المركب حسب خطوات درستها ...والعكس بتعمله لما تشوف الاسم تعرف تكتبه صيغة_بناءية
اللى__شاطر__صيغة_بناءية_وتسمية__شاطر__كيميا_عضوية
طبعا فيها نظرى مهم جدا .. ومعادلات وتحويلات (كيف تحصل على ..من ..)
وتجارب تحضير مهمة ...{ ارسم واكتب فيها طول السنة مش ليلة الامتحان بس }
باختصار العضوية محتاجة مزاكرة اول باول .. وحل كتيير .. وتوكل على الله
فى نفس الكراسة اللى عملتها فوق ... جمع فيها معادلات العضوية ... وراجع الكراسة من وقت للتاني ..
_____________
لو بتقابلك مشكلة فى حفظ المعادلات :
ااه بنسى المعادلات دايما مع انى بحفظها علطول
■لازم تفهمها الأول ..
■تكتبها كذا مرة .. تقولها بصوت عالى ..
■ حل كتير..
معادلة زى دى :
Hcl + Naoh NaCl + H2o
مينفعش تتعامل مع المعادلة انك تقول هحط
(" اتش سي ايل ") + ( " اين ايه اوه اتش " )
لأ .. تعامل مع المعادلة بفهم .. افهم المعادلة !
قل : هحط ( حمض ) الهيدروكلوريد على شوية .. هيدروكسيد الصوديوم اللى هو ( قلوى )
وهيديني ملح وماية ..
آه اه عشان هم حمض وقلوى
انطق المركبات باسمائها .. انطقها بفهم .. واعرف ايه اللى حصل بالمعادلة ^^