أولًا خطة المستوى المبتدئ لتعلم الانجليزى2019
- أولًا: خطة المستوى المبتدئ لتعلم الانجليزى
كثير من الشباب يتسائلون عن خطط مستر مايكل يوسف الخاصة بتعلم اللغة الإنجليزية، ويوجد شباب مازالوا يبحثون عن طرق تساعدهم في تعلم اللغة، لذلك جمعنا لك في هذا المقال خطط مستر مايكل لتعلم اللغة الانجليزية والتي حازت على تقييم إيجابيمن الكثيرين الذين التزموا بها.
لأول وهلة قد تجد أن المقال طويل وتهم بالخروج لكن تأكد إنك ستستفيد كثيرًا إذا قرأته للنهاية لإنه مقسم أجزاء ونقاط لسهولة قراءته وفهمه.
تنقسم الخطط الأساسية لثلاث مستويات:
- خطة المستوى المبتدئ
- خطة المستوى المتوسط
- خطة المحادثة
ملحوظة: جميع الكلام الآتي مأخوذ من مشاركات سابقه لمستر مايكل.
مبدئيًا هتعمل اختبار من موقع ihworld ( ياريت من كمبيوتر مش موبايل )
للدخول للموقع
بعد ما تخلص الامتحان اكتب أي رقم تليفون و أي اسم بس ايميل حقيقي وهيجيلك النتيجة...
لو طلعت A1 او A2 اعمل خطة المستوى المبتدئ ... ولو طلعت B1 سواء ( B1.1 او B1.2 ) اعمل خطة المستوى المتوسط ثم خطة الايلتس ولو طلعت B2 ممكن تعمل الايلتس علطول لكن انا بفضل انك تذاكر خطة المستوى المتوسط قبلها.
أولًا: خطة المستوى المبتدئ لتعلم الانجليزى
1- مدة الخطة وما ستحتاج إليه:
- الخطة مدتها من 3 لـ 4 شهور.
- هتذاكر كل يوم من ساعتين لـ ثلاث ساعات يوميًا.
- هتحتاج 3 كتب أساسيين وهم:
Basic English Grammar Book 1
English Vocabulary in Use Elementary
Essential English Grammar in Use 2nd Ed
هتلاقي رابط للكتب pdf في نهاية الخطة هنا ولو حابب تذاكر منهم ورقيًا ممكن تروح تطبعهم عند أي مكتبة تعرفها، أو بننصحك بمكتبة فاست برنت هنسيبلك تفاصيل عنها في نهاية الخطة برده. ( الموضوع مش موضوع كتب بس ولكن إزاي تذاكر الكتب دي بأقصي استفادة )
- هتحتاج قاموس انجليزي - عربي واخر انجليزي - انجليزي.
" تستطيع الإختيار من القواميس المقترحة للأندرويد في مقال سابق للدخول إليها اضغط هنا "
2- ملاحظات و نصائح قبل البدء: ( اقرأ الملاحظات والشرح اكتر من مرة قبل ما تفكر تبدأ الخطة )
- الموضوع كله إزاي تذاكر اكتر من إنه تذاكر إيه، يعني ممكن يبقى عندك ألف كتاب انجليزي ومش عارف تبدأ إزاي، ركز هنا علشان تعرف إيه المطلوب منك تعمله في الاربع شهور.
- مفيش حاجة هتعملها و تنجح فيها بدون تعب، لازم تتعب وتجتهد عشان توصل، سواء قررت تاخد كورسات او تذاكر لوحدك عمرك ما هتتعلم غير بالصبر و الاجتهاد و الاستمرار.
- مفيش كورس هيعلمك من غير ما تذاكر و لو نفذت الخطة زي ما هشرح كإنك أخدت 4 مستويات في الدورات بدون ما تدفع مليم.
- أوعى أبدًا تترجم جمل بالقاموس حتى لو هو فيه الخاصيه دي ( زي مترجم جوجل مثلًا ) لإن الكمبيوتر مش بيفكر و بنسبة كبيرة الجمل هتبقى ترجمتها مش صحيحة.
- اعرف إن مفيش محادثة بدون جرامر ابدًا، يعني أي حد بيعلمك ويقولك دورات محادثة بدون جرامر يبقى بيضحك عليك، مش هتعرف تتكلم بدون جرامر ابدًا يعني هو الأساس.
- اغلب الناس بتقول ان مستواهم متوسط في اللغة وبلاقي إنهم مبتدئين، قواعد جرامر كتير بسيطة مش بيعرفوها بالتالي بفضل إن الناس كلها تضع أساس سليم عشان تعرف تطور اللغة بتاعتها صح.
- هتقول مش هعرف اذاكر لوحدي ولازم حد يشجعني! يبقي عمرك ما هتذاكر، اتعب في أول خطة و بعد كدا هتستريح في اللغة وهتستمر.
- في البدايه مش هتفهم أي حاجة و هتمر بمرحلة "صدمة " مع اللغة الإنجليزية، المرحلة دي ممكن تاخد شهر وبعد كدا هتلاقي الدنيا بدأت توضح المهم انك تستمر وتعرف انك مش هتفهم اي حاجة في البداية.
- مهمتك في البداية انك تحاول تفهم وتحفظ كلمات و تنطق كل كلمة خمس مرات مع قاموس ناطق، يعني هترجم كل كلمة للعربية (وده شيء صعب في البداية ) وتنطقها مع قاموس انجليزي كذا مرة.
- انت مش طالب، يعني مش هتذاكر الخطة عشان تدخل امتحان في الآخر ولكن عشان تتعلم انجليزي وتعرف تعبر عن نفسك وتستخدمه صح.
- الكتب مليانة جمل كتير سواء في التدريبات او الشرح، بعد لما تنطق الكلمات لوحدها انطق الجمل نفسها انطق كل جملةخمس مرات وقولها بصوت متذاكرش بدون صوت.
- أول خطوة ( أول شهر ) هو الأصعب فإستحمله لإنك هترجم كل كلمة ماتعرفهاش وبعد كدا هتلاقي الكلمات بتتكرر وبدل ما هترجم الصفحه كلها هتلاقي نفسك بتترجم 50% ثم 30% ثم 20% من الصفحه وهكذا.
- خلي الانجليزي جزء من حياتك اليومية وده شيء مهم جدًا، يعني كل لما تلاقي نفسك فاضي كرر الجمل، بتكلم اصدقائك المقربين استخدم معاهم أي جمل اتعلمتها، بتكتب مشاركة على الفيس بوك اكتب اي جملة اتعلمتها وهكذا.
- اعمل كشكول للكلمات مرتب ابجديا ، يعني مثلا اعمل لكل حرف ….A B C D خمس صفحات، وقسم الصفحة اربع اعمدة واكتب اي كلمة تقابلك في الكتب بترجمتها فيه.
- بلاش تحفظ كلمات بالكتابة لان ده تضييع وقت، ممكن تعمل حاجة احسن وهو انك تقرأ الكلمات الجديدة وتنطقها مع القاموس وعادي انك تنسي، تعال بليل اقراها تاني ويوم في الاسبوع اقرأ كل كلمات الكشكول ولو مرة بس.
- مش هتفهم من البداية لان الصورة الكبيرة مش في ذهنك لسه، ممكن تفضل شهر كل وظيفتك انك بترجم كلمات وتنطقها بس وبتحاول تفهم وتيجي تقرأ حاجة تلاقي نفسك بدأت تفهم والموضوع اتحسن، المهم تستمر وتجتهد.
- في أول شهر مش هتحل تدريبات خالص، هتذاكر الكلمات والنطق وتكرر أي جملة تقابلك فقط، بعد كدا هتحل التدريبات.
- لما تحل التدريبات في الكتابين ( Essential Grammar in Use - English Vocabulary in Use ) هتلاقي الإجابات في آخر الكتاب، شوف الحل الصحيح ولكن الاهم انك بعد لما تتأكد من الاجابة هو انك تنطق الجمل كلها كل جملة خمس مرات والموضوع ده مهم جدًا لاكتساب اللغة، مهم جدًا تقرأ رأس السؤال وترجم كل كلمة وتفهم ايه المطلوب.
3- جدول الخطة الاسبوعي:
دلوقتي هقولك تذاكر إيه وإزاي بالترتيب ولازم تعمل الترتيب دا زي ما هشرحه بالظبط، هيكون اسبوعي مقسم لـ 12 اسبوع.
الاسبوع الأول
من كتاب English Vocabulary in Use هتذاكر 8 وحدات وهم:
- Unit 3 Parts of the body
- Unit 4 Clothes
- Unit 11 In the kitchen
- Unit 12 in the bedroom and bathroom
- Unit 14 Jobs
- Unit 13 In the living room
- Unit 15 At school and University
- Unit 25 Countries and nationalities
ومن كتاب Basic English Grammar هتذاكر Unit 3 Nouns
المفروض الـ 8 وحدات من أول كتاب عبارة عن 8 صفحات يعني ممكن تاخد كل يوم صفحتين وتسيب 3 أيام للفصل التالت من تاني كتاب وهو كبير شوية لإنه عن الاسماء.
زي ما قولت فوق مش هتحل تدريبات، انت بس هترجم الكلمات للعربية ( بلاش تترجم جمل خالص ) وتنطقها مع قاموس انجليزي - انجليزي وتحاول تفهم.
الاسبوع الثاني
من كتاب Essential English Grammar
الاول محتاج تعرف إزاي بنختصر حاجة زي I am لـ I’m مش لازم تفهم كل حاجة زي ما اتفقنا بس مهم تفهم دي دلوقتي.
هتبدأ بالملحق الرابع بآخر الكتاب Appendix 4
وبعدين الوحدات دي بالترتيب ( 64 - 65 - 66 - 67 - 68 - 69 )
الوحدات عبارة عن صفحة واحدة بس و زي ما اتفقنا اول شهر مفيش فيه حل تدريبات يعني مش هتحل التدريبات دلوقتي. ممكن تاخد كل يوم وحدتين يعني هتخلصهم في 3 ايام بس.
ومن كتاب English Vocabulary in Use هتذاكر الآتي
- Unit 29 Animals
- Unit 8 Conversations 1: Greetings and wishes
الوحدتين دول هتخلصهم في يومين خلي بالك انا عايز تنطق كل كلمة خمس مرات وتعرف معناها بالعربي وتنطق الجُمل كمانخمس مرات.
ومن كتاب Basic English Grammar هتذاكر Unit 4 Pronouns
الوحدة دي تاخد منك يوم او اتنين بالكتير.
الاسبوع الثالث
من كتاب Basic English Grammar هتذاكر Unit 7 Verbs and Tenses
دي وحدة الافعال والازمنة وهي 30 صفحة هتبقى الاسبوع كله و متتوقعش انك هتفهم كل حاجة زي ما قلت قبل كدا، ولكن اجتهدوترجم واصبر.
هتاخد معاها في نفس الاسبوع Unit 92 من كتاب Essential English Grammar
الاسبوع الرابع
من كتاب English Vocabulary in Use هتذاكر 4 وحدات وهم:
- Unit 17 Holidays
- Unit 18 Shops and shopping
- Unit 19 In a hotel
- Unit 20 Eating out
خلصهم في يومين لانهم اربع صفحات بس
ومن كتاب Essential English Grammar هتذاكر Units 1 and 2
هتخلصهم في يوم
ومن كتاب Basic English Grammar هتذاكر Unit 5 Adjectives
خلص الوحدة في 3 ايام
باقي في الاسبوع يوم ، اقرأ فيه الوحدات السابقة على قد ما تقدر وبيفضل اليوم ده تذاكر اكتر من 3 ساعات لو تقدر، انت هتقرأ بس مش هتعمل حاجة تانية.
الاسبوع الخامس
انت كده ذاكرت 26 وحدة، المفروض الاسبوع ده كله تحل التدريبات بتاعتهم، ممكن تلاقي نفسك مش فاكر حرف من أي حاجة ! ده طبيعي جدًا لإنك لسه في أول خطوة في اللغة متقلقش اعمل اللي عليك.
ممكن كل يوم تحل تدريبات من 2 لـ 3 وحدات بس اهم شيء انك تنطق كل الكلمات مع قاموس ناطق وتنطق الجمل بعد ما تعرف الإجابة الصحيحة.
مش هتفهم كل حاجة طبعًا لإنك بدأت من نقطة البداية ولوحدك،.. اصبر وكله هيتفهم مع الوقت والمذاكرة،.. المهم تستمر انا بطمنك انك لو استمريت هتفهم وهتبقى تمام.
الاسبوع السادس
من كتاب Essential English Grammar هتذاكر Units 5, 6, 7, 23, 24, 39, 42, 56 and 57
المفروض انت كده بقالك اكتر من شهر بتذاكر يعني الموضوع بدأ يتحسن معاك، خلص ال 9 وحدات بالتدريبات وبالنطق في اربع ايام.
ومن كتاب Basic English Grammar هتذاكر Unit 6 Determiners
الوحدة 6 صفحات، خلصها في يوم بالتدريبات.
ومن كتاب English Vocabulary in Use هتذاكر 4 وحدات وهم:
- Unit 21 Sports
- Unit 22 Cinema
- Unit 24 Music and musical instruments
- Unit 26 Weather
خلصهم في يومين بالتدريبات.
الاسبوع السابع
من كتاب Essential English Grammar هتذاكر Units 3, 4, 8, 26, 27, 36, 38 and 50
خلصهم بالتدريبات والنطق في اربع ايام.
ومن كتاب Basic English Grammar هتذاكر
- Unit 8 Subject-verb agreement
- Unit 9 Adverbs
خلصهم في يومين.
ومن كتاب English Vocabulary in Use هتذاكر
- Unit 50 Days, months, seasons
- Unit 51 Time words
خلصهم في يوم.
الاسبوع الثامن
من كتاب Basic English Grammar هتذاكر
- Unit 13 Sentences
- Unit 11 Conjunctions
خلصهم علي يومين.
ومن كتاب Essential English Grammar هتذاكر Units 9, 10, 11 and 12
خلصهم علي يومين.
ومن كتاب English Vocabulary in Use هتذاكر Units 48 and 49
خلصه في يوم واحد بس.
ومن كتاب Essential English Grammar هتذاكر Units 15, 16, 17, 18 and 20
خلصهم في يومين.
الاسبوع التاسع
من كتاب Basic English Grammar هتذاكر Unit 10 Prepositions
ومن كتاب Essential English Grammar هتذاكر Units 99, 100 and 101
خلصهم في يومين.
ومن كتاب English Vocabulary in Use هتذاكر Units 13 and 14
خلصهم في يوم.
ومن كتاب Essential English Grammar هتذاكر Units 25, 43, 44, 45, 46, 47 and 48
خلصهم في اربع ايام.
الاسبوع العاشر
من كتاب English Vocabulary in Use هتذاكر Units 36, 37, 38, 39, 40 and 41
خلصهم في 3 ايام.
ومن كتاب Essential English Grammar هتذاكر Units 28, 29, 30, 31, 32, 33 and 34
خلصهم في اربع ايام.
الاسبوع الحادي عشر
من كتاب English Vocabulary in Use هتذاكر Units 42, 43, 44, 45, 46 and 47
خلصهم في 3 ايام.
ومن كتاب Essential English Grammar هتذاكر Units 19, 40, 49, 21, 22, 50, 51 and 52
خلصهم في اربع ايام.
الاسبوع الثاني عشر
من كتاب English Vocabulary in Use هتذاكر Units 30, 33, 34, 35, 54, 55, 56 and 57
ومن كتاب Essential English Grammar هتذاكر Units 35, 53, 58, 59, 61, 62, 63 and 73
بكده انت بدأت مشوار تعلم اللغة الانجليزية ولو نفذت الخطة فعلا هيبقى مستواك كويس وجاهز تبدأ في خطة المستوى المتوسط، وطبعًا على حسب مجهودك.
انت مش هتخلص الكتب من الاول للاخر عمومًا في الاربع شهور، انا عملتلك جدول فعال وهتلاقي الحاجة بتتكرر أكتر من مرة علشان لو مش فاهم من دي تفهم من دي.
الكتب الأساسية مرفوعة pdf على جوجل درايف وهتلاقي مع الكتب الآتي:
- ملف ترجمة لكتاب English Grammar Book 1 مقدم من الاستاذة Asmaa Mohammed
- ملف حل تدريبات لنفس الكتاب مقدم من Menna Emad
- قاموس صخر عربي - انجليزي للويندوز
- جدول للخطة مقدم من محمد زهران
للدخول وتحميل الكتب pdf
ولو عايز الكتب مطبوعة بجودة عالية ألوان أو أبيض وأسود هتلاقيها في مكتبة فاست برنت وعنوانها ( بين السرايات أمام باب تجارة جامعة القاهرة اسفل مطعم كوك دور مكتبة فاست برنت ممر الصاوى تانى محل يمين ) أو أطلبها شحن لمحافظتك من صاحب المكتبة Ayman Mohamed Gouda او اخوه وليد جوده بيشحنوا لأي مكان.
وفي تطبيق مجاني للأندرويد إسمه ELSA Speak بيساعدك تتعلم النطق السليم في الإنجليزية، ممكن تعمل معاه محادثات جاهزة علشان تشوف نطقك وتسمعه، وممكن تكتب له جملة وهينطقها ليك و بعدين تنطقها انت وراه ويقولك نطقك صح كام في الـ %.
كل يوم استخدمه في وقت فراغك أو وإنت بتذاكر الخطة كإنه لعبه وانطق معاه كلمات الاول وبعد كدا جمل، وبيحتاج اتصال بالانترنت عشان يشتغل.
- إلي هنا نكون قد انتهينا من سرد خطة المبتدئين لتعلم اللغة الانجليزية، ويبقى فقط ان تبدأ بها وتجتهد لتخطي هذه المرحلة وتكون على استعداد بالبدء بخطة المتوسط والتي سنذكر لك تفاصيلها في المقال القادم بإذن الله.
أكونت مستر مايكل على الفيس بوك: Michael Youssef
لو لسة محصلتش على الكتيب المجانى واللى بيتكلم عن التعلم الذاتى وازاى تبدا رحلتك فى الكورسات الاونلاين بشكل مؤثر وفعال، تقدر تحصل عليه مجانا من هنا: لينك تحميل الكتاب
تعليقات
إرسال تعليق
اترك تعليقك